القائمة الرئيسية

الصفحات

المعرفة " ليه سن الـ 30 مختلف أهم التغيرات

 ليه سن الـ 30 مختلف ومُميز؟ اعرفي الأسباب

الوصول لسن الثلاثين شىء أحيانًا مُربك وأحيانًا مُفرح خصوصا للستات، لأن فترة الثلاثينات بتكون مختلفة في حاجات كتير، هى مش بس بداية لإنجازات متنوعة ولكنها بتكون أكتر فترة نضوج ووضوح لحاجات كتير كانت رمادية في فترة العشرينات. وعشان كده لو قربتي على سن الثلاثين أو انتي فعلًا بتعيشي فترة الثلاثينات حاليًا، هقولك على أسباب كتير بتخلي الفترة دي مُميزة وغير أي فترة تانية في حياتك. سن الثلاثين عند النساء ايه المختلف والمُميز في فترة الثلاثينات خصوصا عند السيدات؟ 

1- تجارب جديدة بخبرات سابقة انك تعيشي خبرات وتجارب جديدة ده هيفضل يحصل في كل فترة من فترات حياتك، لكن في فترة الثلاثين هيكون مُميز لأنك هتخوضي كل التجارب دي بخبرات سابقة اكتسبتيها من العشرينات، غالبًا هتكوني درستي واشتغلتي ومريتي بعلاقات عاطفية وصاحبتي ناس وسبتي ناس وسافرتي واتعلمتي حاجات كتير من كل حاجة حصلتلك، وده اللي هيخليكي تتعاملي مع كل حاجة بطريقة مختلفة في فترة الثلاثينات.

 2- هتعرفي انتي مين وعايزة ايه بنات كتير ممكن تقرأ العنوان ده وتضحك وتقول أنا وصلت للثلاثين ولسه ماعرفتش، بس الحقيقة إن بشكل أو بآخر لما بنوصل لسن الثلاثين ونعيش الفترة دي عمومًا بتكون شخصياتنا اتغيرت كتير عن لما كنا في أوائل العشرينات، ولو قارنتي بين شخصيتك ساعتها ودلوقتي هتعرفي الفرق. في الثلاثين هتحسي إنك بتعملي اللي انتي عايزاه وبس، مش هتبقي حريصة إن شخصيتك تعجب حد أو ترتبطي لمجرد إن صحابك مرتبطين، أو إنك تروحي أماكن مش عايزاها أو تعملي أي حاجة عشان ترضي غيرك، غالبًا هتروحي للحاجات اللي بتريحك وبس!


3- هتهتمي بنفسك أكتر فترة العشرينات غالبًا ما بتكون عبارة عن جري بس، بتجري عشان تلحقي الشغل والكارير وتثبتي نفسك، بتجري عشان تختاري شريك كويس ومتفاهم معاكي، بتجري عشان ترضي ناس كتير وتهتمي بمشاكل ناس تانية ويمكن ساعات كتير تيجي على نفسك، بس الثلاثينات غير! في فترة الثلاثينات هتحسي إن نسبة كبيرة من اهتمامك ليكي أنتِ، هتهتمي ببشرتك، بصحتك، بإنك تبسطي نفسك وماتجيش عليها عشان خاطر حد، مش هتدي وقت لنفسك أكتر وتستمتعي بحياتك بطريقة أحسن. 

4- نمط حياة صحّي نظريات كتير بتثبت إن الجسم بيلاقي صعوبة أنه يفقد وزن في فترة الثلاثين، لكن ده مش تعميم، وعلى العكس تمامًا في فترة الثلاثين بتكون فاهمة أكتر طبيعة جسمك وايه اللي ينفع معاكي، وبتحاولي تاكلي بطريقة صحية أكتر وتتمرني بشكل مناسب، وناس كتير بتبدأ تمارس رياضة في الثلاثين وبتوصل لنتايج مذهلة، عشان كده ماتسمعيش لأي حاجة مُحبطة وركزي على نفسك واختار نمط حياة صحي يساعدك تحافظي على صحة جسمك.

5-  هتتوقفي عن مقارنة حياتك بالغير   أكتر حاجة ممكن تعكر صفو حياتك هى إنك تبدأي تقارني حياتك بالآخرين وتحسبي اللي هم حققوه واللي انتي حققتي، وفي سن الثلاثين غالبًا هتبدأي تشوفي الحية من منظور مختلف وهتشوفي إن المقارنات مش بتعمل حاجة غير إنها تضايقك وتحسسك بالفشل! هتبدأي تركزي في حياتك أكتر وتشتغلي على نفسك وتحققي اللي بتحلمي بيه بدون النظر لكلام حد أو إنك تبصي ع التراك وتشوفي مين سابقك لأن الحقيقة إننا مش في سباق وماحدش المفروض يوصل الأول.


6- لسه ممكن تبدأي من جديد وتغيري حياتك ستات كتير ممكن تفتكر إن الوصول للثلاثين نهاية لحاجات كتير في حياتهم، بس الحقيقة إن أكتر حاجة بتميز سن الثلاثين أنه مرحلة شباب مختلفة عن العشرينات، في الفترة دي أنتي لسه شباب ولسه عندك فرصة تبدأي من جديد وتاخدي قرارات فيها مجازفة شوية عن الماضي وتغير كل حاجة عشان تأسسي حياة أنتي عايزاها وحابة تعيشها. ماتشوفيش أبدًا إن الثلاثين نهاية العالم عشان دي أكتر فترة ممكن تحققي فيها حاجات وتاخدي قرارات مؤثرة في حياتك.

 7- علاقات عاطفية أكثر نضجًا الدخول في علاقة عاطفية قرار مهم ومؤثر في حياتك، وفي سن الثلاثينات اتخاذ القرار ده بياخد شكل تاني أفضل بالتأكيد، لأنك بعد المرور بخبرات مختلفة في الفترة السابقة بيكون قرارك ده مبني على العقل والعاطفة مش حاجة واحدة فيهم، عشان كده بيكون غالبًا قرار أفضل وأنضج. وعشان كده أبحاث كتير بترسخ فكرة إن قرار الزواج في الثلاثينات بيكون أفضل كتير، وحتى العلاقة الحميمة بعد الثلاثين بتكون أحسن لأن الستات في الفترة دي من العُمر بتكون ناضجة أكتر ومتفهمة للعلاقة الزوجية وطبيعتها أحسن.

 8- علاقاتك بالناس هتكون أوضح في الفترة دي (الثلاثينات) وبشكل لا إرادي هتلاقي إن علاقاتك باللي حواليكي بقيت أوضح وتعريفاتها واضحة، سواء علاقات صداقة أو زمالة أو حتى المعارف والأقارب والأهل، هتلاقي إن دايرة علاقتك بقت أصغر من قبل كده ومافيهاش غير الناس اللي بترتاحي معاهم وبيفهموكي وبتلاقي نفسك وسطهم. والناس الجديدة اللي بتدخليها حياتك هيكونوا مُحددين وبرضو مش هتثقي فيهم غير بعد وقت وإثبات إنهم يستحقوا الثقة دي، وكل ده هيبقى ناتج عن نضج ووصول لمرحلة إيجابية من الطريقة المثالية المُريحة ليكي للتعامل مع الناس.

 9- تعريفك للوحدة هيختلف الثلاثينات بتكون محاولة للاستفادة من العشرينات، واستعداد للأربعينات، عشان كده مفهومك لحاجات كتير هيختلف ومنها مفهوم الوحدة، أحيانًا كتير هتكوني محتاجة تبقي لوحدك، وهتعرفي ازاي تستمتعي بوحدتك، بس ده مش معناه إنك مش هتحتاجي لصُحبة من الأصدقاء أو الحبيب أو الأهل، الفكرة هتكون في إنك هتعرفي تختاري الأشخاص اللي حقيقي مش هيحسسوكي بالوحدة، ولو مش موجودين برضو هتعرفي تستمتعي بصحبة نفسك.